Thursday, April 2, 2009

TIATRACHI MACHI EKA KOLAKARAK EK POVITR VEDI - Sylvester Vaz


TIATRACHI MACHI EKA KOLAKARAK EK POVITR VEDI:

SYLVESTER VAZ



To Konknni machier soglleam von lamb kolakar, Amitabh Bachchan-a sarkho ani tache kuddi porim tachi chintnam lamb rund. Taka Hitman of Konkani Stage mhonn pacharta. Halinch aplea ganv-ghara suttiam khatir ailolo tednam bhetton JIVIT-acho Prokaxok Michael Gracias-an Sylvester Vaz hanche lagim kelolea bhasabhaxecho ek vantto.



Konknni machier tuji survat...



Tornnato koso amchea Povitr Athmeache firgojent, Moddgonvam hanv zaiteoch karyavolli ghoddun haddtalom. Ek pautt firgojechea tornnatteamnim ek tiatr korunk tharailem. Alex Rangel hannem ‘Koslo Kaido?’ tiatr boroilolo. Punn uprant hanvem to porot boroun kaddlo ani machier dakholl kelo. Hea tiatrak neimit Kala Academichea tiatr spordhent vantto ghevpi Mazod’deche Kala Niketan sonstheche vangddi asle. Tannim mhaka tanchea ‘Vonnot’ tiatrant bhag gheunk kovit dilo. Hea tiatran dusream kolakaram vangdda Mario de Vasco obhinoi kortalo. Tannem mhaka tachea poileach vevsaik tiatr ‘Dhump’ hantunt vanttekar kelo. Thoim thavn ... mollobuch mhoji xim tharli!



Tunvem proyogi (experimental) tiatramnim toxeach vevsaik (commercial ) tiatramnim vantto ghetla. He donui madheom koxe?



Proyogi tiatramnim ek kolakar koso tuji vadd zata. Tum zaitem kitem xikunk pavta. Ek ‘role analysis’ koso korcho, tum ubharta tea patrak koslo sobau zai, koslim angvostram zai. Ek ekttor koso tum purnponni toyar asta. Proyogi tiatr polleupi lokui teach nodren ani opekxen yetat.

Vevsaik tiatramnim ek kolakar koso tum bandlolo asta. Lokak kitem avoddtolem hachi tunvem zannvikai dourunk zai. Dekhik vhoddlea tallean ulovp. (bobatt marop?) Chodd vhoddlean uloita to soglleam von vhoddlo actor mhonn sozmotat!







Donui madheomache tiatr tuje mukhar manddlear tum khoincho...



Donui tiatramnim mhaka suchoilolea patracho ‘career graph’ boro ani mhaka mandta toslo asot zalear hanv vell korun donui sondheo svikartolom. Mhaka ozunui ‘stagecraft’-a vhoir zaitem xikchem asa tem mhaka proyogi tiatramnim korunk mellta. Vevsaik tiatran bori bhumika/kantar mhollem zalear, tuka lokacho mog mellta, tokhnnai mellta ani bhov sonkhen lok ho tiatr polloita mhonntoch eka gavpeak aplo vichar ximpddaunk soeg mellta.



Tum poilo konn.. ? kantorist vo partist?



Kolakar. Tiatr pollenaranim mhaka Partist tosoch Kantorist mhunn eka farak mandun ghetlo anik heach pasot mhaka vhoddle ani nanvoste directoranim aplea tiatranim apoilo.Eka director-ak hanv ek stepney tair. Goroz thoim hanvem mhaka bosovn gheupacho.



Tiatramnim tuji vadd koxi zali?



Survatek thoddeank dislem hanv ek ‘modern singer’, punn obhinoi korpachi mhoji kapostad polloun mhaka ekttor koso mandun ghetlo. Aiz pasun chodd tiatranim hanvem opening chorus gaileat anik mukhi bhumika keleat.




Tuka Tiatr mhollear kitem?



Devacho mog porgott korpachem ek madheom vo sadhon! Ji kola mhaka Devan dilea ti kola Devache mhoime khatir vaprop.



Tiatranchea khustar pott bhorum yeta?



Kiteak na? Zaitech bhortat. Punn ek mat, tunvem xist samballunk zai. Tuka tor Konknni bhaxecho mog na, tuka tiatrancho mog na. Tum fokt tiatram khustar poixech komaunk sodta zalear tum khoinch pavchona, hemvui soth.





Tuka Hitman of Konkani Stage mhonnta. Hem kiteak? Tum dishum dishum korta, tum rupan sundor mhonntoch tujea ‘heat’-ak lagon kai...



Ek minutt...Hanv ahinvsen visvass dovortam. Hanv ekdom ‘cool’ monis. Atam 2001 vorsa Tony Dias hacho Ti Mhoji Maim tiatr Gulfachea bhonvdder vochpacho aslo. Kuwaitachea xharant Navelim Youth Centre-an ho tiatr manddlolo. Tiatracho propaganda kortana hanv machier ‘hit’ roles dita to polloun tannim mhaka to brid diun prochar kelo. Mhaka ‘embarrasment’ zata, punn mogan dilolea nanvan mog asta moipass asta. Hanv to svikartam.



Tiatrist ‘cool’ asta?



Kiteak na? Mhojea nodrek zaitech zollkota. Thoddeank lagon soglleank ekech tagdden zokhunk favona.



Kuwaitant jivit koxem...?



Ekdom tezachem. Vegachem! Gõyant konnacheanui ugtteponnim ravonk zata. Thoim kaideanchi xist borich koddokh asa.





Tum Kitem korta?



Hanv Kuwaitant nanvoste Company Al-Wazzan Group-achea Chairman-ache kocherint Management Head Offisant, Administrative Officer mhonn kam polletam.





Gõyant astana tum dhormik vavrant gul’l aslo…



Thoimsorui asa. Hanv ani mhoji potinn Irene, Holy Family Igorjent Devsondexkar asat. Sukrara disachea 8 horanchea Misachea Choir-ache ami vangddi. Tech bhaxen Carismatic Renewal Movement-ant ami asat.



Kuwaitant Konknnicho vavr koso cholta?



Ami amchea ganv-ghara thavn pois asa mhonnttoch dor eka Gõychea Kuwaitkarak Konknni bhaxecho mog. Hanga zaiteoch Konknnicheo karyavolleo zata. Tiatr, Musical Shows, One Act Play Competition, Singing Competition adi. Kuwaitiant aslole zaite tiatrist aple tiatr dhakoitat. Punn don vorsam zait ailim ekui oslo tiatr zaunk nam, Atam Gõyche readymade tiatr adtat.

Mhaka ugdass asa toddim vorsam fattim, mhaka sond mevli Munglur anik Gõyche kolakaram vangdda “Konknni Ekvottachi Sanz” hea showant vantto gheunk.Munglurche Wify ani tancho pongodd, Prince Jacob, Humbert, Rita Rose, C D Silva adi hanchoi aspav aslo.

Kuwaitant Konknni rajeanche ap-aple pongodd asat. Mungllurcho pongodd, Kerelkarancho pongodd, Bomoikarancho pongodd he toren. Hea soglleach pongddancho zaitoch vavr cholta.



Ani Gõykaranche?



Gõykaranche zaitech pongodd asat. Mukhi promannan vavr korpi Kuwait Konknni Kendr asa. Konkani Heritage asa, Kuwait Tiatristanchi sonvstha, The Goan Welfare Association asa.

_________________________________________________________________



[ JIVIT - Ank: 8 - Agost 2008 - uzvaddavpi ani porgottpi Michael Gracias, Queeny Productions & Publications, Queeny Visions, Velsao - Pale, Goa

Sompadpi: Vinchi Quadros - Sompadpi Somiti: Pri. Tomas Lobo, Tarkeswar Naik ani John Gomes (Kokoy) ].



(Goa-World.Com Team kheritponnim JIVIT magik dinvstat)

No comments:

Post a Comment